حبيتِك لإلتزامِك
حبيتك لإلتزامك .. حبيتك لاحترامك
حبيت فيكي التواضع والعزة اللي ف كلامك
مبســـوط منك لأنك إســـلامك كل همــــك
أنـا أصلي قابلت بابا واداني فكـرة عنك
وسـألته عن طباعك إن كانت يعني هاديـة
فحكالي عن سمـاعك لكلامه وانت راضية
وازاي بتسلي نفســـك بذكـرك وانت فاضية
وحلاوه صوت تلاوتك و إذاى بتكونى شاديه
وسألته إن كنتي فاهمة معنى كلمة زوجين
قالي هتكونوا ورقـــة مطبـوعة نسختين
غنـي كنت أو فقيــر .. ليك عند بنتي ديـــن
سرك هيكون في بير معرفش مكانه فيـن
تفضل دايماً كبيـر في نظرها حبتيــن
لو جيت بفلوس كتير .. تطمن جت منين
هتكون دايماً معاهـا . . سيرتك هتكون هواهـا
والشوق اللي ف خيالك تلقـاه لحظة لقاهـا
لو جيت زعلان ف مرة إرمي همومك وراها
ومهمـا شوفـت بـره مش هتشوف مستواهــا
واطمــن يابني خـالص عقـلها مافيهوش تفـاهــه
وزى ما هى بنتى .. بنت حماتها و حماها
وسألته عن ولادي منك هيكونوا إيــه ؟
قاللي هيكونوا عــادي . . فسألته يعني إيـه ؟
قاللي العادي إللي كان عند الناس من زمـان
العادي بتاع سـراقة وحذيفة بن اليمـان
العادى بتاع اسامه و ابن الحكيم لقمان
ده العادي بتاعنا إحنا بنربي عليه عشان
لو جينا ولا رحنــا هنقابل الرحمـــن
عمرك ما تخاف عليهم . . ولادك في الأمان
أنا بنتي هتربيهـــــم ع السنة والقــرآن
هتشـوف ابنك بيصحى مادام سمـع الأذان
ينزل في الفجر يقــرأ بالسجدة والانسـان
هتشوف في حجاب بناتك العفة والإحسان
هتشوف اذاى مراتك هتعينك انت كمان
وسألته عن حياتــك من قبل الالتــزام
قال أتذكر في ليلة مش فاكر أنهي عام
أذان الفجــر أذن . . وقالتلي سيبني أنـام
فدخلت الأوضه جوه أجيب منها الحزام
وعقبال ما رجعت تاني كانت رجعت ف الكلام
الله يجازي الشيطـان خلاها تقول نام
بس اطمــن خلاص دلوقتي بقت تمـام
قدملي مكة كـولا . . قاللي اتفضل وسمي
احسن من سكه كولا .. صدقنى و خدها منى
قلتله طيب ياعمي . . يسعدني أقولك إني
بطلب بنتك ونفسي تناسبني وترضى عني
راح شادد فجأه لبسي وقلب وشه وسألنــي
حافظ كم جزء يابني وقاري كم كتاب
احكيلي كده عن مؤته أو غزوة الأحزاب
وسامع كم حديث في الأخذ بالأسباب
وكمان سمعلي آيه ذكرت فيها الدواب
ولو شايفها صعبة قوللي بتاعة الذباب
واحكيلي حلم يوسف وبراءة الذئاب
واخواته لما جولوه دخلوا من أنهي باب
واديني فكرة برضه بتقبض كم ثواب
وناوي ازاي تحسن دا أنا شايفك لسه شاب
وسأل نفسه وسألني هيعوز إيه يعني مني ؟
لو عندي كل حاجـــه وديني مش شاغلني
أحسن لك تنسى بنتي ومهرك مش لازمني
قلتله صبرك ياعمــي وبراحتك امتحنــي
قاللى يبقى اما أسأل تجاوبنى خليك دايماً فاهمنـي
سألتك وانت سـاكت خليتني أظن ظـني
وفضل يسأل واجاوب . . وعشان خاطرك عصرني
وظهرت النتيجه و بفضل الله قبلنى
قاللي مقبول في نظري . . مبروك عليك ياسيدي
لكن في نظرها هــي . . نجاحك مش بإيـدي
وهي زمانها راجعة من تمرين السويــدي
خليك قاعد شويــة . . استنا لما تيجــــي
هعملك من إيديــــا كوباية شاي صعيــــدي
سابني وقعدت أفكر . . هل ممكن ترفضيني !
طاب قولي حتى أفكر . . مش يمكن تفهميني
وفضل مخي يلاعبنــي يجيبني ويودينـــي
وخايف من المقابلـة . . مرعوب بينك وبيني
ودق الباب في ثانيــة . . وشوفتك مرة تانيـة
مش قادر أنسى يومهـــا وفاكر كل ثانيـــة
ونده والدك عليكـي . . عشان أول لقــاء
دخلتي وشوفت وشك عليه نور الحياء
نور والله فعـــلاً . . مش نور بودرة وزواء
كان أول مرة أخــاف من فتنة النســـاء
اخلاقك مش عاديه و جمالك كان شفاء
قعدتي جنب والـــدك وسألتيني وجاوبتــــك
وف كل مرة أجــاوب كنت باشوف ابتسامتــك
ف أقول من جوه نفسـي يارب أكون عجبتك
وبعد شوية قمتـــي . . ندهت عليكي مامتــك
ورحتى دخلتى جوا وراح والدك وراكى
وانا قلت مش مروح غير لما اكون خطبتك
وابوكي جاني تانــي وقرب من وداني
لابس كرفته ســـوده وبدله لونها فرانــي
المنظر يعني كلــــه ميدلش ع التهانــي
قلتله مالك ياعمـــي من فضلك قول عشان
عرقي غرقلي كمـــي سايبني ليه أعانـــي
قاللي مستني إيــه . . فين إيدك إديهانـي
البنت مش موافقـة تتجوز حد تانـــي
كان أول مرة أعرف إزاي الناس بتفرح
سعادتي كات غريبــة مش ممكن هقدر أشــرح
من كتر حبي ليكـــي نويت أضحي وادبــــح
رحت اشتريت خروف وكان خروف بينطح
دا اخيرا هبقى جوزك و شجره صبرى تطرح
خطوبتنا كانت بسيطة مكانش فيها زيطة
وفرحنا كان في جامع .. يعني مش خلطبيطة
ومامتك جت في يومها ورقعت كام سويطة
هاتولي بنتي منــه . . دي مش فاهمة العبيطة
انه هيخطفها منى و توحشنى الغتيته
صعبت عليا مامتك . . الموقف كان شديد
لكن فعلاً خطفتـك ورحنا مكان بعيـد
فاكرة ولا انتي ناسية . . أكيد فاكرة أكيــد
من يوم ما بقيتي زوجتي وانا متهني وسعيــد
معايا ف كل يـوم . . ويوم لقاكي عيــد
عمرك ما دقتي نــوم وانا تعبان أو مريــض
فلوسي كانت بتكتـر والخير عندك يزيـد
وعامله ليا دفتــر ومرتبالى المواعيــــد
وبفضل الله قدرتــي وجبتيلي الوليــــد
وبعديها بشويـة جبتيلنا عليه يزيــد
وبعديه جت سميــة وآخرهم كان حميـــد
بدعيلك كل يوم وأفضل أعيد وازيد
ربيتي عيالي دول ع القرآن المجيــــد
طول عمرك وانتي صافية . . قلبك لون الجليد
أخلاقهم مش عادية . . طالعنلك مش بعيــد
وليد دلوقتي ضابط ومعاه رتبة عقيــــد
ودعوة قلبي صابت .. ويزيد أهو مات شهيد
وبنتك صيدليـة . . وحميد أصبح معيد
الله يرحم أبوكي . . راجل من نوع فريد
كل الى قاله فيكى انا عشته بالتحديد
عشت معاكي ف حكاية أحلى وأجمل رواية
حكايتي كانت معاكى وحكايتك كانت معايا
اديتك كل عمري وهمك كان رضايـــا
وعمرك خدته منك وقربك كان دوايـــا
وخلاص العمر راح .. راحت ايام صبايا
ومسافر رحله صعبة . . وزادي مش كفايــــــه
مش عاوز أشوف دموعك بالذات ف يوم عزايا
أنا عارف و إنتي عارفة إن الموت مش نهايـــــة
دي لسة الرحلة طالعة والموت خط البدايـــة
إدعيلي يمكن أوصــل وأشوف هناك حمايا
انا عارف انه فيها محجوزله هناك سرير
وسلامي في النهاية . . أنا خلصت الحكاية
لو يوم فكرتي فيا . . إقري شعري وغنايا
وأمانه ف كل مرة تدعي لي بالهدايه
عسى ربي بدعائك . . يغفر ليا الخطايا
</B></I>
